Roscón

Intercambio de receitas da cociña galega de sempre.
Avatar do Utilizador
crisanto
Socio/a
Socio/a
Mensagens: 211
Registado: sexta, 29 fev 2008, 11:11

Roscón

Mensagempor crisanto » quarta, 04 mar 2009, 20:57

Ola a todos:

Hai unha sobremesa que eu sempre comín aínda de ben pequeno era o Roscón. Ainda hoxe ó comer un roscón no pobo lembro aquel cheiro tan doce e arrecente. Denantes nas festas sempre facían o roscón no forno de leña do pobo. Tódalas mulleres sabíano facer. Daba xenio velas sentadas no patio que estaba preto do forno batendo con ritmo insistente nos caldeiros novos que se mercaban para a ocasión. Había mulleres novas e non tan novas, unhas aprendendo e outras batendo ás xeiras pois botaban case dúas horas dándolle ó batedor. Agora esta tradición xa se foi e o forno xa o derrubaron e os roscóns encárganse ó panadeiro que aínda segue facendo os roscóns e o pan de maneira tradicional aínda que mais industrial.

Velaí vai a receita desta gorentosa sobremesa:

Roscón

Ingredientes:
* 6 ovos
* 6 culleres de azucre
* 6 culleres de fariña
* 1 sobre de fermento en po

Descrición:

Escachámolos ovos e separámolas claras das xemas.

Batémolas claras máis 3 culleres de azucre a piques de neve e reservámolo.

Batemos ben as xemas mailas outras 3 culleres de azucre ata que dobre o seu volume.

Mesturámolo coas claras a piques de neve coa axuda dunha espádoa ou co batedor pero sen bater.

Peneirámola fariña mailo fermento cun coador e engadímolos a mestura anterior tamén remexendo e sen bater.

Vertémolo todo nun molde de roscón engraxado i enfariñado e metémolo no forno quente a 150ºC durante 2 horas

Antes de sacalo do forno comprobar se esta feito picándoo cunha agulla de calceta. Ten que saír limpa.

Nota: O tempo e a temperatura do forno tanto do roscón coma de calquera outro biscoito depende sempre do volume distes, pois un biscoito ou roscón, de pouco volume ou pouca altura, hai que facelo a máis temperatura e menos tempo, e darémoslle menos temperatura e mais tempo, se ten máis volume ou son mais altos, para que o calor vaia pasando ata dentro e non se nos queime por fora.


Coma moitas veces vos digo esta e máis receitas as tedes nasta ligazón de máis abaixo:
http://www.fillos.org/galicia/index.php ... nc=catview

Saúdos e sorte

bershky
Mensagens: 465
Registado: quarta, 18 jan 2006, 10:39

Roscón

Mensagempor bershky » quarta, 04 mar 2009, 22:00

Dúas horas no forno? seis ovos?

Miña naiciña... vaiche saír todo esturruxado!

Crisanto, o roscón de pobo, non leva pos máxicos ;-)

Avatar do Utilizador
crisanto
Socio/a
Socio/a
Mensagens: 211
Registado: sexta, 29 fev 2008, 11:11

Roscón

Mensagempor crisanto » quinta, 05 mar 2009, 16:29

Corrixo dende eiqui. Tes razón Bershky, duas horas son moitas horas ainda que sexan a 150ºC. coido que un roscón de 6 ovos a 175ºC cheganlle de abondo 45 minutos.
No tema do fermento en po, hay moita xente que non bate de abondo os ovos e cómpre botarlle os "pós máxicos" O roscón e calquera outro biscoito non leva fermento algún, maís para iso hai que bater a modo os ovos.

bershky
Mensagens: 465
Registado: quarta, 18 jan 2006, 10:39

Roscón

Mensagempor bershky » sexta, 06 mar 2009, 19:53

Efectivamente! Hainos que ir batendo paseniño. Lémbrome de cativa, que nas festas do pobo, as mulleres da familia ( porque antes eran unha morea de irmáns, primas , tías, etc.) , boeno, pois sentánbase na cociña facendo círculo para batelos. Botábanos ovos i o azucre e un chisquiño de sal, nun balde dunhos 10 L. máis ou menos. Empezaba unha batendoos, e cando cansaba, pasáballo a seguinte, e así sucesivamente ─Eran ingredientes para un roscón grande, coido que dunha ducia de ovos-─ Esmérabanse moitísimo en bateren na mesma dirección, e coa mesma intensidade, sin perdelo ritmo, de xeito que os ovos foran subindo a modiño e non baixaran . O punto xusto dos ovos montados, era cando se podía escribir con eles, explícome:

Erguíano batidor , e coa masa esvarizando por el, escribían por enriba dos ovos montados. Obvio, cando se apreciábanas letras, a masa estaba pronta. Èra entonces cando procedían a engadirlle a fariña, de vagariño e remexendo con moito coidadiño para que a masa non minguara.

A masa do roscón è moi delicada, se logo de batela mingua, o cocere, o biscoito colle becerra.


Receita da Avelina [miña nai]


Unha ducia de ovos
Unha culler de azucre e de fariña por ovo.
Un chisquiño de sal.

Primeiro: batelos ovos co azucre i o chisquiño de sal, deica que se poida escribir coa masa ( os ovos teñen que estar á temperatura ambiente ?suben mellor- ) ─mais nonos vaides deixar no corredor a xeada ou a recacheira do sol ─ Brincadeira! X-D


Segundo: engadir de vagariño a fariña e ir remexendo a masa, a amodiño.


Terceiro: botala masa no molde previamente untado coa manteca, et voilá, listo para metelo no forno.


[O forno ten que estar ben quente, de xeito que ó acenderemos como unha media hora antes por enriba e por embaixo a 250°C . No intre de metelo a cocer, baixámola temperatura a 150°C -180°C e deixámolo entre 45 minutos e unha hora. Namentres estea cocendo, non se pode abrila porta do forno, corre o risco de baixala masa, e logo amazócase]

O pasare 45 minutos, e cando se poide controlar, mesmamente cun paociño aguzado, deses tipo "espeto moruno"


Crisanto, sabes como o comiamos nós, logo que pasaba a festa? Polas mañás enchoupado en viño tinto. UMMM? unha auténtica delicia para as palilas gostativas.

Sorte co experimento!

Sede ledos e boiños ;-)


Voltar para “Gastronomía”

Quem está ligado:

Utilizadores neste fórum: Nenhum utilizador registado e 4 visitantes