En breves minutos comezará por medio da lista de correo habitual para estas cuestións a X asemblea xeral de socios de Fillos de Galicia. Nela trataranse como temas principais:

• Que propostas das recibidas para facerse cargo de Fillos.org e demais proxectos se aproban.
• A disolución ou non da asociación.
• En caso de continuar a asociación, elección da nova xunta directiva da mesma.

Como se pode ver vai ser unha asemblea decisiva para o noso futuro. Daremos nestas mesmas páxinas conta do resultado, e posiblemente tamén emitiremos comunicados de prensa segundo o que se decida por parte dos 30 socios que a día de hoxe formamos a asociación.

Nestes últimos días tivemos problema de sobrecarga no noso servidor debidos á aplicación Dinastats do noso fornecedor Dinahosting. Ao estaren accesibles a calquera internauta as estatísticas desta aplicación no enderezo http://www.fillos.org/dinastats2/ e non estar optimizada para webs tan visitados coma o noso, provocaba caídas do sistema con demasiado frecuencia. Polo tanto decidimos volver a poñelas privadas.

Se calquera persoa ou entidade está interesada en coñecer as estatísticas actualizadas de visitas a Fillos.org pode solicitárnolas poñéndose en contacto connosco. Outras cifras históricas tédelas na nosa habitual sección estatisticas.fillos.org. Lamentamos os problemas ocasionados, pero pareceunos que ofrecer esta información ao público era unha mostra de transparencia convinte dentro do proceso aberto de Un futuro para Fillos no que convocamos a outras entidades a se faceren cargo dos nosos servizos.

Dentro das medidas adoptadas polos socios da Asociación Cultural Fillos de Galicia o pasado día 22 de Febreiro, dentro da posta en marcha da convocatoria Un futuro para Fillos, está a seguinte:

Que se fagan contas coas horas que os voluntarios teñan pendentes de compensar en galeuros e que se lles ingresen os galeuros correspondentes, dentro das normas vixentes da moeda, antes do 1 de Marzo. A partir desa data suspéndese a compensación en galeuros das horas de traballo voluntario.

Lamentamos informar desta medida con case 3 semanas de retraso, pero a situación na nosa asociación é complicada nestes momentos de cambios. Pregamos a todos os nosos voluntarios que se poñan en contacto co Coordinador o antes posible para proceder a saldar as horas adicadas en galeuros, que deberán ter rexistradas axeitadamente na aplicación de groupware.

Con esta medida remata por desgraza (se cadra temporalmente) un periodo no que todo o traballo voluntario en Fillos era compensado con este moeda complementaria.

A versión online da prestixiosa revista Tempos Novos, ofrece hoxe unha noticia sobre o noso proceso Un futuro para Fillos.

Tras un ano de interinidade na súa dirección, a asociación cultural Fillos de Galicia decidiu traspasar os seus proxectos en Internet a outras entidades ou particulares capaces de xestionalos e melloralos.

O máis coñecido deles, o portal Fillos.org, xunta nunha “rede social” a máis de 6.800 galegos e descendentes. Este portal naceu en 1997 pola iniciativa de Manuel Casal Lodeiro, informático fillo de galegos emigrados a Biscaia. Posteriormente creárase a asociación “Fillos de Galicia” para darlle soporte legal e “organizar un grupo de xente comprometida coa Galeguidade que fose axudando a definir o proxecto”, segundo explica o seu fundador e actual secretario en funcións. Malia os repetidos intentos por parte da asociación, o número de usuarios que entraron a facer parte dese grupo “comprometido” non deu superado o 1%.

Tras a IX asemblea de socios celebrada o ano pasado, orixinouse unha falta de relevo na dirección que se veu agravanda por problemas técnicos co servidor onde aloxan os seus webs. Un ano despois asumiron como definitiva a carencia dalgún socio que asuma as tarefas directivas e de coordinación. “Eu prolonguei a miña adicación ao proxecto canto puiden, e tentei conseguir financiamento para quen continuase o tivese máis doado, pero sen unha dirección eficaz é inútil”, lamenta Casal Lodeiro, que tras varios anos advertindo
de que o proxecto dependía demasiado do seu compromiso persoal e da súa coordinación diaria, tivo que renunciar por motivos persoais a seguir nos postos directivos da asociación. “Cadrou que o noso
presidente tamén comunicara hai un ano que non podía continuar no seu cargo”, engade xustificando que a suma de circunstancias persoais e económicas levaron á asociación a recoñecer que “non é quen de
continuar cos proxectos e pedirmos a outros que o intenten: o noso público é importante e está aí, na Rede, agardando que alguén lle siga a fornecer cultura galega e contacto co país”. Por este motivo veñen de publicar en Fillos.org unha convocatoria aberta a toda a sociedade galega á procura dun relevo na xestión e dirección
dun sitio web que se convertira xa no “sétimo centro galego do mundo” en número de usuarios.

Asemade de Fillos.org, a asociación solicita propostas para dirixir Galeguidade.net (portal para as entidades galegas da emigración), eTIqueTAL.com (outra rede social para mocear en galego), Debulla.info, Nomes-Galegos.info, Planeta-Galego.info e outros webs e dominios que foron creando durante estes 13 anos de
intensa actividade na Rede.

Hoxe publiquei na sección aberta ao envío dos lectores unha nova acerca do noso proceso Un Futuro para Fillos.

Diante da escasa e confusa difusión que está a ter a nosa convocatoria e a nota de prensa, imos ver de explicar doutra maneira que é o que pasa en Fillos de Galicia e como pretendemos amañalo.

CulturaGalega.org dixo que liquidabamos os nosos proxectos…

Xornal primeiro que buscabamos un padriño e agora que se un xestor…

Pois non, non é ningunha das 3. Se cadra, despois de 13 anos nisto xa nin sei facer unha nota de prensa que se entenda.

Vouno explicar de xeito esquemático, a ver se teño máis sorte que có comunicado orixinal:
- O que buscamos é quen continúe cos proxectos: nós xa non podemos.
- Por que non podemos? En 1º lugar porque xa non temos unha persoa que poida dirixilos. En 2º polas dificuldade económicas para pagarmos traballadores.
- Quen pode facerse coas rendas de Fillos? Calquera que presente un proxecto que convenza aos socios de que vai continuar co espíritu do proxecto e que ten a capacidade de facelo.
- Como hai que presentar as propostas? Mediante unha pequena memoria que sega un esquema explicado nun PDF que temos no noso portal.
- E logo o resto dos webs de Fillos? Outro tanto: agás algunha excepción, cedémolos todos.
- Pero é unha venda ou dámolos de balde? Iso queda na man de cada persoa ou entidade que nos faga unha proposta.
- Vai desaparecer a Asociación que ata o de agora levou Fillos.org? Iso decidirémolo despois de vermos as propostas e se aceptamos algunha(s) delas.
- Ata cando hai de tempo para presentar as ofertas? Non moito: ata o 14 de Marzo de 2010. Os motivos persoais que fan que os que coordinamos actualmente Fillos non poidamos continuar levan prolongándose xa demasiado tempo e fan precisa unha solución urxente para o futuro de Fillos.
- Que interese pode ter facerse cargo de Fillos? Cada quen deberá avalialo. Simplemente o valor económico do que imos ceder podería ser unha boa razón, se non abondan as razóns culturais altruístas.
- A quen hai que comunicar as ofertas? Ao secretario en funcións da nosa asociación. O contacto tédelo na sección Contactar de Fillos.org

Apareceu a nova na edición impresa e tamén na online.

Enviamos unha queixa polo primeiro titular que puxeron: Fillos.org busca padriño para sobrevivir (foi co que saiu na edición impresa, coidamos) e trocárono por Fillos.org busca xestor para sobrevivir que tampouco encaixa no que buscamos: semella unha oferta de emprego! A primeira non era axeitada porque lembraba a campaña que fixemos hai anos para atoparmos sponsors.

A maior comunidade virtual de galegos emigrados sae a concurso co resto de sitios de Fillos de Galicia, que non pode seguir xestionándoos.

Con trece anos de vida e case 6.800 usuarios ás costas, a meirande comunidade virtual de galegos emigrados busca padriño. Fillos.org, o portal con máis peso dos que xestiona a asociación cultural Fillos de Galicia, con 27 socios, é a oferta máis apetecible no concurso que acaba de abrir a entidade para atopar algunha forma de colaboración que manteña activos estes dominios.

“Por cuestións persoais, cadrou que tanto o presidente da etapa anterior como eu mesmo, non podemos seguir dedicándolle tempo a estes labores de coordinación”, explica Manuel Casal Lodeiro, secretario en funcións da asociación. Con ánimo, asegura que “esto é algo que lles pasa a moitas asociacións cando acadan unha estrutura que é demasiado complexa, lles consome demasiados recursos e non a dan soportado internamente e, ao final, o que fan é unha especie de partilla”.

En www.fillos.org están dispoñibles as condicións para presentar a correspondente proposta para mercar directamente algún dos dominios da asociación, adquirir os dereitos de explotación sen mercalo, entrar en co propiedade con Fillos de Galicia ou só asumir unha subcontratación da xestión do sitio. En calquera caso, Casal subliña que é imprescindible garantir a “continuidade” do proxecto: “A opción de disolvernos e liquidar todo barallouse, pero non quixemos”. “Hai proxectos que poden ser máis interesantes para unha institución, fundación ou empresa, pero outros non –expica–; pero se cadra cos recursos que obteñamos podemos seguir mantendo algún dos portais”.

Os cartos en sí non son o problema, senón a falta dun equipo disposto a coordinar o traballo. Pero é certo que o diñeiro supón unha carga engadida, sobre todo desde que perderon o apoio da Xunta. “A finais de 2009 rematou o convenio que tiñamos coa Secretaría Xeral de Inmigración, que nos aseguraba unha pequena financiación de 15.000 euros ao longo do ano –conta Casal–; este convenio deixárao asinado o anterior goberno, pero agora fomos falar co novo equipo do PP e en principio dixéronnos que non había problema en renovalo pero non sabemos nada desde mediados de xaneiro”.

De feito, a propia Xunta sería unha boa candidata para xestionar tanto Fillos.org como Atopadoiro.org, unha base de datos de xente que se busca, porque tanto esta como a TVG teñen arquivos similares e sería unha boa cousa unificalas “baixo unha supervisión política. “De feito, durante moito tempo, a xente dicíanos que estabamos facendo o traballo da Xunta”, conta Manuel. “Moitos concellos que tiñan procuras familiares derivaban a xente cara a nós. Eso está ben, pero xa podían contribuir un pouco!”

Ata o 14 de marzo, aquelas institucións, empresas ou particulares que queiran asumir a xestión dalgún dos máis de dez dominios que ten Fillos de Galicia poden enviar as súas propostas a secretaria@fillos.org. “Non ten que ser un plan moi detallado, pero si unhas liñas básicas do que queren facer co sitio”, explica Casal. A principios de abril, a asociación comunicará o novo xestor dos seus dominios, se hai sorte.

O contido do artigo está bastante ben, pero o título é pouco afortunado e non dan acertado a interpretar que é o que buscamos Estamos tendo bastante mala sorte coa escasa e confusa trasmisión que están a facer os medios galegos da nosa convocatoria. Iso non axuda para nada ao seu éxito.

Raquel Noya publica hoxe un artigo en Código Cero, acerca da nosa situación:

A asociación responsable da principal rede social da emigración galega en Internet, Fillos de Galicia, unha comunidade virtual que ten como obxectivo manter e divulgar a galeguidade entre os descendentes da diáspora galega, vén de anunciar que ten intención de traspasar os seus proxectos na Rede a outras entidades ou particulares que poidan xestionalos e melloralos, entre eles o máis coñecido, Fillos.org.

A decisión foi tomada logo dun ano de interinidade na dirección desta asociación cultural, e logo de comprobar que malia os repetidos intentos de promocionar o proxecto Fillos.org, o portal máis coñecido da entidade, o número de usuarios que entraron para formar parte do grupo, non superou o 1 por cento.

Fillos.org, unha rede social con máis de 6.800 galegos e descendentes adscritos, foi creada en 1997 por Manuel Casal Lodeiro, un informático fillo de galegos emigrados a Biscaia, que posteriormente dou lugar á creación da asociación Fillos de Galicia para darlle soporte legal e “organizar un grupo de xente comprometida coa galeguidade que fose axudando a definir o proxecto”.

Agora, tras 13 anos de actividade na Rede, os responsables deste proxecto reclámanlle a algunha persoa ou entidade privada que se faga cargo da mesma xa que, segundo palabras do seu creador, “sen unha dirección eficaz é inútil”.
Casal Lodeiro afirma que prolongou a súa adicación ao proxecto “canto puiden” pero logo de varios anos advertindo que o proxecto dependía demasiado do seu compromiso persoal e da súa coordinación diaria, tivo que renunciar por motivos persoais a seguir nos postos directivos da asociación, algo que tamén anunciou o seu presidente un ano atrás.

A suma de “circunstancias persoais e económicas” levan agora á asociación a recoñecer que “non é quen de continuar cos proxectos”, e pídenlle a terceiras persoas que o intenten xa que “o noso público é importante e está aí, na Rede, agardando que alguén lle siga a fornecer cultura galega e contacto co país”.
É por isto que a asociación vén de publicar unha convocatoria aberta a toda a cidadanía, á procura dun relevo na xestión e dirección dos seus sitios web, tanto de Fillos.org, como de Galeguidade.net, eTIqueTAL.com, Debulla.info, Nome-Galegos.info e Planeta-Galego.info entre outros dominios.
Mais iso si, os responsables da iniciativa lembranlle ás persoas interesadas en dirixir o proxecto que Fillos.org “é xa o sétimo centro galego do mundo en número de usuarios”, máis non así en solvencia económica, claro está.

A nota reflicte bastante ben a situación e a nota que emitimos, mais o comentario final acerca da solvencia dá a entender que a xornalista non captou cal é realmente o problema: non estamos nesta situación por falta de cartos senón por falta de dirección.

Hoxe apareceu esta reseña no portal da cultura galega acerca da convocatoria Un futuro para fillos. Queremos matizar o seu titular, que nos parece que non informa correctamente sobre o proceso.

Segundo o dicionario da Academida Galega, liquidar é:

liquidar v.t.

1. Pagar completamente [unha conta, débeda, etc.]. Ata que liquide as débedas non me dan outro crédito. SIN. saldar.
2. Vender [mercancía] rebaixando considerablemente o prezo. O bazar liquidaba todo por reformas. SIN. saldar.
3. fig. e fam. Facer que [algo] deixe de existir e, por extensión, dar morte. A este paso van liquida-la flota pesqueira. SIN. destruír.Liquidounos a tiros. SIN. matar.
4. Consumir [unha cousa] totalmente, en pouco tempo. Liquidaron de contado o que quedaba da torta.
5. Dar fin a [un asunto, preito, etc.]. Liquídase así un contencioso que duraba xa dous lustros. // v.i. 6. Econ. Axustar formalmente as contas dun negocio. Para liquidar contrata un contable.

Coido que ningún deses significados se aplica ao proceso actual que encetou a nosa asociación: trátase de recibirmos propostas de continuidade. Unhas poderán ser económicas e outras non; unhas poderán implicar o traspado da propiedade e outras non; e desde logo o que pretendemos é que ningunha desas opcións signifique a morte e desaparición dos proxectos e servizos, todo o contrario.

Así que agradecemos a CulturaGalega.org a difusión pero pregamos que corrixan a nova.

Fillos de Galicia ofrece os seus proxectos en Internet a quen queira encargarse deles
Ler o rsto desta entrada »

A Asociación Cultural Fillos de Galicia comunica á sociedade galega que tras 13 anos de existencia dos seus proxectos en Internet, dos que o portal e rede social Fillos.org é o máis sobranceiro, recoñécese incapaz de seguir a administralos. A unha constante insuficiencia de financiamento uniuse a falta dun relevo na dirección que non se deu solucionado desde e a IX asemblea xeral de socios celebrada hai agora un ano, na que xa se convertera nun problema alarmante. Sen fondos e sen persoas que poidan asumir a dirección dos proxectos, os socios decidimos facer pública a situación e buscar fóra da nosa organización, no conxunto da sociedade galega, a continuidade do principal referente da Diáspora galega en Internet, Fillos de Galicia, e de todos os demais proxectos que fomos poñendo en marcha ao longo destes anos de ilusión e esforzo compartido.

Así é que realizamos a presente convocatoria social para recibirmos propostas que aseguren un futuro aos nosos diversos webs:

• Fillos.org: Comunidade Virtual (rede social) con case 7.000 membros, principalmente descendentes de emigrantes galegos.
• Atopadoiro.org: Base de datos e servizo para o reencontro familiar, con case 4.000 rexistros.
• RedeGalega.org: Servizos de Internet para ONG galegas.
• Tenda online de Fillos.org (actualmente ubicada en http://www.galeuros.com/tenda ).
• DeGalicia.org: Web auxiliar de Fillos.org onde se albergan e-mails de socios e outros contidos.
• Galeguidade.net: Noticias das entidades da diáspora galega.
• PlanetaGalega.info: Webzine da diáspora galega.
• eTIqueTAL.com: Rede social galega baseada en etiquetas (tagging).
• Nomes-Galegos.info: Wiki de antroponimia galega.
• Debulla.info: Xestor compartido de ligazóns (bookmarking social).
• Nacionalidad-Espanola.info: Wiki informativo sobre a recuperación da nacionalidade.
• Amortedacosta.info: Web sobre a catástrofe do Prestige.
• E toda unha serie de dominios sen contidos asociados, ou redirixidos a algún dos anteriores ou sección dos mesmos.

Destas propiedades queda excluída Galeuros.com porque xa tiñamos aprobada a súa cesión a unha nova entidade pendente de conformar conxuntamente con outras persoas e organizacións, e Parcelaria.com porque o compromiso cos seus participantes era ata 2016 e imos encargarnos de deixalo cumprido.

O conxunto das propiedades online da nosa organización foi valorado a comezos de 2008 por unha empresa especializada independente, en 625.500 euros. Daquela a nosa intención ao solicitar unha taxación era avaliar a posibilidade de achegar esas propiedades como patrimonio fundacional para unha posible nova entidade que asegurase o futuro das nosas actividades: unha Fundación que nunca chegou a consitituirse. Así e todo, aí está esa cuantificación económica do traballo feito ate aquel momento:

Para la valoración que presentamos en este informe, se toma como el criterio valido principal, la inversión que supondría a cualquier organización adquirir el impacto en la red que posee en la actualidad la Asociación Cultural Fillos de Galicia a través de sus diferentes dominios. (…) Estimación del valor económico de la actividad de los espacios web de la Asociación Cultural Fillos de Galicia:
625.500 euros.

O obxectivo da presente convocatoria é que o traballo e esforzo de socios, colaboradores, voluntarios e traballadores de Fillos de Galicia ao longo destes 13 anos, poida ser non soamente conservado como un patrimonio que é de todos os galegos e galegas, e mais dos seus descendentes, senón que sexa por fin plenamente desenvolto e mellorado a prol dos seus usuarios e da pervivencia da cultura galega na Diáspora e no país, algo para o cal a nosa asociación xa non se considera capacitada. O que creamos desde Fillos foi algo tan grande que acabou por esgotar a capacide e o esforzo voluntarista da presada de persoas que conformamos a asociación. Agora coidamos que é o momento de que novas forzas continúen de mellor xeito o que nós comezamos.

As persoas a título individual ou entidades públicas ou privadas, comerciais ou non lucrativas, que estean interesadas en facerse cargo dalgún ou de varios destes webs e servizos, deberán enviar a secretaria ARROBA fillos PUNTO org antes do día 14 de Marzo unha breve memoria coa súa proposta, que conteña cando menos os apartados e características indicados no documento PDF que elaboramos con información máis completa. En caso de ser necesario, nós solicitaríamos aclaracións ou maiores detalles aos propoñentes.

Posteriormente os socios da nosa Asociación Cultural, reunidos nunha nova asemblea estudarán as propostas recibidas e decidirán sobre elas, nun prazo que prevemos non supere o 31 de Marzo. Nesa mesma asemblea prevese someter tamén a votación, en función dos resultados desta convocatoria, a posible disolución da nosa organización. Tras a asemblea, durante o mes de Abril, aplicaríanse os acordos e procederíase á cesión efectiva dos webs nos casos que a Asociación aprobase, e se así fose decidido, á súa autodisolución como organización.

Grazas de antemán a todos os que vos interesedes por continuar o noso traballo cultural e social.

Para ampliar información:

• Aparicións de Fillos de Galicia nos medios de comunicación
• Taxación independente do valor de Fillos de Galicia (realizada en 2008): enviarase aos interesados que a soliciten a secretaria ARROBA fillos PUNTO org
• Anteriores notas de prensa de Fillos
• Ensaio premiado en 2003 pola Xunta de Galicia, reflexionando sobre a utilidade e interese dun proxecto como Fillos de Galicia
• Máis datos e artigos sobre Fillos de Galicia
• Consultas: secretaria ARROBA fillos PUNTO org